Deu 20 | NdeIBE | STEP | Lapho liphuma ukuya kulwa lesitha senu empini libe selibona amabhiza lezinqola kanye lebutho elikhulu ukwedlula elenu, lingabesabi, ngoba uJehova uNkulunkulu wenu, owalikhupha eGibhithe, uzakuba lani.

Deuteronomy 20

Imithetho yempi

1 Lapho liphuma ukuya kulwa lesitha senu empini libe selibona amabhiza lezinqola kanye lebutho elikhulu ukwedlula elenu, lingabesabi, ngoba uJehova uNkulunkulu wenu, owalikhupha eGibhithe, uzakuba lani. 2 Nxa selilungele ukuhlasela, umphristi uzakuza akhulume lebutho. 3 Uzakuthi: “Zwana, we Israyeli, namuhla liya ekuhlaseleni izitha zenu. Lingapheli amandla kumbe lesabe; lingatshaywa luvalo njalo lethuke phambi kwabo. 4 Ngoba uJehova uNkulunkulu wenu nguye ohamba lani ukuyalilwela ezitheni zenu ukuba linqobe.”

5 Izikhulu zizakuthi ebuthweni: “Ukhona owakhe indlu entsha ongazange ayinikele ngokuyahlukanisela na? Kabuyele emzini wakhe, funa afe empini kuthi omunye anikele indlu yakhe ngokuyahlukanisela. 6 Ukhona ohlanyele isivini kodwa engakadli izithelo zaso na? Kabuyele emzini wakhe, funa afe empini kuthi omunye azidlele izithelo zaso. 7 Ukhona osethembise owesifazana kodwa engakamthathi ukuthi abe ngumkakhe na? Kabuyele emzini wakhe, funa afe empini kuthi omunye umuntu amthathe.” 8 Izikhulu zizaqhubeka zithi, “Ikhona indoda eyesabayo kumbe ephelelwa ngamandla na? Kayibuyele emzini wayo ukuze abafowabo labo bangaphelelwa ngamandla.” 9 Kuzakuthi lapho izikhulu seziqedile ukukhuluma lebutho, zizakhetha abalawuli bebutho.

10 Nxa lisiya edolobheni ukuthi lihlasele, khulumani labantu bakulelodolobho lidinga ukuthula. 11 Bangavuma njalo balivulele amasango abo, bonke abantu bakulelodolobho bazakuba yizichaka zenu balisebenzele.

12 Kodwa bangala ukwamukela amazwi enu okuthula balihlasele, livimbezeleni lelodolobho. 13 Kuzakuthi lapho uJehova uNkulunkulu wenu esenikele idolobho lelo kini, libulale amadoda wonke ngenkemba.

14 Kodwa abesifazana, abantwana, izifuyo kanye lakho konke okukulelodolobho kuzakuba yimpango yenu. Yonke impango yezitha zenu uJehova uNkulunkulu wenu alinika yona izakuba ngeyenu. 15 Lokhu yikho okumele likwenze emadolobheni wonke akude lani njalo angasiwo ezizwe ezihlala eduzane lani.

16 Kanti-ke, emadolobheni ezizwe uJehova uNkulunkulu wenu alinika wona njengelifa, lingatshiyi lutho oluphefumulayo luphila.

17 Lizawabhubhisa liwaqede wonke – amaHithi, ama-Amori, ama-Khenani, amaPherizi, amaHivi kanye lamaJebusi – njengokulaywa kwenu nguJehova uNkulunkulu wenu. 18 Funa balifundise ukwenza imikhuba yabo enengekayo yokukhonza onkulunkulu babo, lone kuJehova uNkulunkulu wenu.

19 Uma idolobho selilivimbezele okwesikhathi eside, lilihlasela ukuze lilithumbe, lingatshabalalisi izihlahla zalo ngokuzigamula, ngoba lingadla izithelo zazo. Lingazigamuli. Kambe izihlahla zeganga zingabantu ukuthi lingazivimbezela na? 20 Kodwa-ke lingagamula izihlahla elizaziyo ukuthi azitheli izithelo ezidliwayo ukuze lisebenzise ekwakheni amadumba lize linqobe impi ledolobho lelo.